Geldingahnappur

(Armeria maritima) af gullintoppuætt. Blómin eru fölbleik, fremur smá og standa þétt saman í hnöttóttum kolli þannig að fljótt á litið líkist kollurinn stöku blómi. Blöðin sem eru neðst eru striklaga og mynda oft litla þúfu. Blómstilkurinn er hinsvegar alltaf blaðlaus. Geldingahnappur finnst víða í Evrópu og er þá oftast bundinn við strandsvæði. Hann er mjög algengur hér á landi við strendur, á melum og söndum bæði á láglendi og ekki síst á hálendi, þar sem hann finnst einnig í sendnum víðimóum. Hann finnst einnig í þurru gras- eða mólendi. Hann blómgast í júní. Heimild: Hörður Kristinsson 1986. Plöntuhandbókin. Blómplöntur og byrkningar. Íslensk náttúra II. Örn og Örlygur, Reykjavík. 306 bls. Geldingahnappurinn góði. “Gleður augað ósegjanlega,” segir Þuríður Sigurðardóttir, myndlistarmaður. “Sumstaðar er geldingahnappur einsog vin í eyðimörk. Það er ótrúlegt hvar hann holar sér niður, gjarnan þar sem lítill annar gróður er fyrir. Á þeim stöðum gleður hann augað ósegjanlega,” segir Þuríður Sigurðardóttir listmálari og bæjarlistamaður Garðabæjar. Geldingahnappurinn þrífst helst og best í sendnum malarjarðvegi. “Fyrir vikið sker þetta bleika blóm sig oft býsna mikið úr í umhverfinu. Rétt einsog hið smáa og litla í umhverfinu gerir yfirleitt, bara ef við gefum okkur tíma til að líta í kringum okkur. Oft látum við hjá líða að huga að því.” Sem fyrr er landslag og náttúra ósjaldan viðfangsefni þeirra íslensku myndlistarmanna sem í dag eru helst í kastljósinu. “Í dag eru listamenn fæstir að mála landslagsverk einsog gömlu meistararnir gerðu. Samtímalistamenn nálgast viðfangsefni sín með öðrum hætti. Sjálf hef ég hinsvegar mikið sótt í nærmyndir, meðal annars af blómum. Ég er ekki í vafa um að þar hefur uppvöxtur minn í gróðursælu Laugarnesinu í Reykjavík haft áhrif. Þar spruttu m.a. sóleyjar og fíflar á sumrin – og svo auðvitað líka geldingahnappurinn góði,” segir Þuríður Sigurðardóttir.

Til baka