Viltu komast á græna grein?

Þar sem áhugi er fyrir því að taka þátt í verkefninu Skólar á grænni grein er þörf á því að fylla út sérstakt umsóknareyðublað og senda til Landverndar á tölvutæku formi. Eyðublaðið má nálgast hér á þessari slóð. Skráning í verkefnið er forsenda þátttöku í því og síðar umsókn um alþjóðlegu viðurkenninguna Grænfánann. Síðan er hafist handa við að stíga skrefin sjö: - stofna umhverfisnefnd skólans, - meta stöðu umhverfismála í skólanum, - gera áætlun um aðgerðir og markmið til umhverfisbóta í skólanum, - sinna stöðugu eftirliti og endurmati á umhverfismálum í skólanum, - fræða nemendur um umhverfismál, - kynna stefnu sína út á við og fá aðra með, - setja skólanum formlega umhverfisstefnu. Þegar þessi skref hafa verið stigin getur skólinn sótt um að fá Grænfánann. Skólinn getur tekið sér þann tíma sem hann vill til að ná þessum markmiðum. Skólar á grænni grein geta sótt ráðgjöf til verkefnisstjóra Landverndar um allt sem lýtur að þessu starfi. Skólunum býðst að senda fulltrúa á árlega námstefnu um umhverfismál í skólum og Grænfánaverkefnið. Skólar á grænni grein og Grænfánaskólar mynda tengslanet, eiga samstarf og skiptast á upplýsingum. Gjald fyrir hvert skólaár er 100 krónur á hvern nemanda skólans en þó að lágmarki 15.000 kr. á skóla og að hámarki 40.000 kr. Landvernd sendir skólunum reikninga fyrir árgjaldinu. Skráningarblaðinu má gjarnan skila á tölvutæku formi á netfangið graenfani@landvernd.is