Saga

Alviðra og Öndverðarnes II. Elstu heimildir sem þekktar eru um búsetu í Alviðru eru frá því um siðaskipti þegar jörðin sem áður var eign kirkjunnar varð konungseign. Öndverðarnes er talin landnámsjörð, þar nam Grímur landnámsmaður land og er Grímsnes við hann kennt. Jarðirnar Alviðra í Ölfusi og Öndverðarnes II í Grímsnesi eru sameiginleg eign Landverndar og Árnessýslu. Jarðirnar liggja sín hvoru megin við Sogið. Magnús Jóhannesson bóndi í Alviðru afhenti jarðirnar Landvernd og Árnessýslu til eignar með gjafabréfi dags. 1. febrúar 1973. Í bréfinu koma fram kvaðir og óskir gefandans um nýtingu jarðanna. Afrit gjafabréfsins fylgir hér með. Margrét Árnadóttir kona Magnúsar var fædd og uppalin í Alviðru og var einkabarn foreldra sinna sem áttu jarðirnar Alviðru og Öndverðarnes II. Margrét féll frá 1968. Samkvæmt upplýsingum frá Búnaðarsambandi Suðurlands er jörðin Alviðra 651 hektari að stærð. Nokkur hluti jarðarinnar er ógróið land á Ingólfsfjalli. Samkvæmt sömu heimildum eru jarðirnar Öndverðarnes I og II samtals 819 hektarar. Ætla má að Öndverðarnes II sé um helmingur þess. Veiðiréttur í Sogi fyrir landi Öndverðarness og þó einkum Alviðru hafa verið og eru mikilvæg hlunnindi. Veiðiréttur er nú leigður til Stangveiðifélags Reykjavíkur og Stangveiðifélags Selfoss til fimm ára í senn. Í landi Alviðru eru þrír sumarbústaðir og jafnmargir í landi Öndverðarness, allir frá tíð Magnúsar og Margrétar. Mjög lítil eða engin afgjöld eru greidd af lóðum þessara bústaða. Eftir að Landvernd og Árnessýsla eignuðust jarðirnar og Magnús var fluttur frá Alviðru var Alviðra í ábúð í nokkur ár og um tíma hafði Golfklúbbur Selfoss aðstöðu í þar.